ការជឿទុកចិត្តរបស់អ្នកគឺជាអាទិភាពរបស់យើង ហើយការអនុញ្ញាតឱ្យកូនរបស់អ្នកមានគណនី Google គឺជាការសម្រេចចិត្តដ៏សំខាន់មួយ។ សូមចំណាយពេលមួយភ្លែតក្នុងការពិនិត្យមើលព័ត៌មានសំខាន់នេះ ដើម្បីស្វែងយល់បន្ថែម។
គណនី Google របស់កូនអ្នកគឺដូចគណនីរបស់អ្នកដែរ និងផ្ដល់សិទ្ធិចូលប្រើប្រាស់ផលិតផលនិងសេវាកម្មរបស់ Google ជាច្រើន រួមទាំងសេវាកម្មដែលមិនត្រូវបានរចនា ឬរៀបចំឡើងសម្រាប់កុមារ។ កូនរបស់អ្នកប្រហែលជាអាចប្រើប្រាស់គណនីរបស់គាត់ ដើម្បីធ្វើអ្វីៗដូចជា៖
សួរសំណួរ ចូលប្រើ និងស្វែងរកលើអ៊ីនធឺណិតដោយប្រើ Google Assistant, Chrome, ម៉ាស៊ីនស្វែងរក និងមុខងារ AI ដែលមានសមត្ថភាពបង្កើតផ្សេងទៀត
ប្រាស្រ័យទាក់ទងជាមួយអ្នកដទៃដោយប្រើ Gmail, SMS, វីដេអូ, សំឡេង និងវិធីប្រាស្រ័យទាក់ទងផ្សេងទៀត
ទាញយក ទិញ និងរីករាយជាមួយកម្មវិធី ហ្គេម តន្ត្រី ភាពយន្ត និងអ្វីៗជាច្រើនទៀត
បង្កើត មើល និងចែករំលែករូបថត វីដេអូ បទបង្ហាញ ឯកសារ និងខ្លឹមសារផ្សេងទៀត
តាមដានព័ត៌មានអំពីសុខភាព និងសម្បទា រួមទាំងកម្រិតសកម្មភាព និងចង្វាក់បេះដូងនៅក្នុង Google Fit (ផ្អែកលើឧបករណ៍របស់កូនអ្នក)
មើលឃើញការផ្សាយពាណិជ្ជកម្មតាមបរិបទ ពេលកំពុងប្រើប្រាស់សេវាកម្ម Google។
កម្មវិធី Family Link របស់ Google ត្រូវបានរចនាឡើង ដើម្បីជួយអ្នកកំណត់គោលការណ៍មូលដ្ឋាន និងតម្រង់ទិសកូនរបស់អ្នកក្នុងការប្រើប្រាស់ នៅពេលគាត់រុករកនៅលើអ៊ីនធឺណិត។ កូនរបស់អ្នកនឹងក្លាយជាផ្នែកមួយនៃក្រុមគ្រួសារ Google របស់អ្នក ដែលអ្នកអាចប្រើ ដើម្បីចែករំលែកសេវាកម្ម Google ជាមួយកូនរបស់អ្នក និងសមាជិកគ្រួសារផ្សេងទៀតរហូតដល់បួននាក់។ អ្នកនឹងអាចបញ្ចូលមាតាបិតាម្នាក់ទៀតនៅពេលក្រោយ ដើម្បីជួយគ្រប់គ្រងគណនីរបស់កូនអ្នក។ មាតាបិតាអាចប្រើ Family Link ដើម្បីធ្វើសកម្មភាពផ្សេងៗដូចជា៖
កំណត់រយៈពេលកំណត់សម្រាប់ប្រើប្រាស់ឧបករណ៍ Android ឬ ChromeOS របស់កូនអ្នក។
មើលទីតាំងឧបករណ៍ Android ដែលសកម្ម និងបានចូលគណនីរបស់កូនអ្នក។
អនុញ្ញាតចំពោះការទាញយក និងការទិញរបស់កូនអ្នកនៅលើ Google Play ឬដាក់កំហិតលើលទ្ធភាពមើលឃើញខ្លឹមសារ ដោយផ្អែកលើការវាយតម្លៃភាពសមស្រប
ជួយកូនរបស់អ្នកជ្រើសរើសប្រភេទសកម្មភាព ដែលអាចរក្សាទុកនៅក្នុងគណនី Google របស់គាត់ និងរបៀបដែលគណនីនោះអាចត្រូវបានប្រើ ដើម្បីកំណត់បទពិសោធន៍ប្រើប្រាស់ឱ្យស្របនឹងគាត់។
គ្រប់គ្រងការកំណត់ដូចជា ការស្វែងរកដោយសុវត្ថិភាពសម្រាប់ម៉ាស៊ីនស្វែងរកនៅលើ Google។
ពិនិត្យមើលការអនុញ្ញាតកម្មវិធីរបស់កូនអ្នកដូចជា សិទ្ធិចូលប្រើមីក្រូហ្វូន កាមេរ៉ា និងទំនាក់ទំនងនៅលើ Android និង ChromeOS។
ផ្លាស់ប្ដូរខ្លឹមសារ សិទ្ធិចូលប្រើប្រាស់ និងការកំណត់ផ្សេងទៀតសម្រាប់បទពិសោធប្រើប្រាស់ YouTube រួមទាំង YouTube និង YouTube Kids។
ទោះបីជាការគ្រប់គ្រងដោយមាតាបិតារបស់ Family Link អាចជួយអ្នកមើលការខុសត្រូវ និងគ្រប់គ្រងបទពិសោធន៍ប្រើប្រាស់របស់កូនអ្នកក៏ដោយ ក៏មានការដាក់កំហិតដែលអ្នកគួរតែចងចាំ៖
ទោះបីជាការគ្រប់គ្រងដោយមាតាបិតារបស់ Family Link ជាច្រើនអាចគ្រប់គ្រងនៅលើបណ្ដាញក៏ដោយ ក៏អ្នកនឹងនៅតែត្រូវការកម្មវិធី Family Link នៅលើ Android ឬ iOS ដដែល ដើម្បីគ្រប់គ្រងមុខងារមួយចំនួនដូចជា ការដាក់កំហិតលើរយៈពេលប្រើប្រាស់ឧបករណ៍ជាដើម។
ការកំណត់ ដូចជាការស្វែងរកដោយសុវត្ថិភាព, ការដាក់កំហិតគេហទំព័ររបស់ Chrome និងតម្រង Play Store អាចជួយរឹតត្បិតការចូលប្រើខ្លឹមសារមិនសមរម្យ ប៉ុន្តែការកំណត់ទាំងនេះមិនល្អឥតខ្ចោះនោះទេ។ មុខងារ AI ដែលមានសមត្ថភាពបង្កើតអាចប្រឌិតសាច់រឿងឡើង ឬយល់សំណួរខុស ដូច្នេះអ្នកប្រហែលជាចង់រំលឹកកូនរបស់អ្នកឱ្យផ្ទៀងផ្ទាត់ព័ត៌មានជាមួយប្រភពដែលអាចទុកចិត្តបាន។ សូម្បីនៅពេលការគ្រប់គ្រងទាំងនេះត្រូវបានបើកក៏ដោយ ក៏កូនរបស់អ្នកនៅតែអាចចូលមើលខ្លឹមសារដែលអ្នកមិនចង់ឱ្យគាត់ឃើញដែរ។
មិនត្រូវការការអនុញ្ញាតពីមាតាបិតាទេ នៅពេលកូនរបស់អ្នកទាញយកឡើងវិញនូវកម្មវិធី ឬខ្លឹមសារផ្សេងទៀតដែលត្រូវបានអនុញ្ញាតពីមុន ដំឡើងកំណែកម្មវិធីថ្មី (សូម្បីតែកំណែថ្មីដែលបញ្ចូលខ្លឹមសារ ឬស្នើសុំទិន្នន័យឬការអនុញ្ញាតបន្ថែមក៏ដោយ) ឬទាញយកខ្លឹមសារដែលបានចែករំលែកពីបណ្ណាល័យគ្រួសារ Google Play របស់អ្នក។
មុខងារ Family Link មួយចំនួនអាចប្រើប្រាស់បានដោយមានកំណត់ ព្រមទាំងត្រូវការការកំណត់និងកាលៈទេសៈជាក់លាក់ ដើម្បីដំណើរការបាន។ ឧទាហរណ៍ ការទប់ស្កាត់កម្មវិធីអាចធ្វើបានតែនៅពេលកូនរបស់អ្នកចូលឧបករណ៍ Android ឬ ChromeOS ដែលត្រូវគ្នាប៉ុណ្ណោះ ហើយការមើលឃើញទីតាំងឧបករណ៍របស់កូនអ្នកនៅក្នុងកម្មវិធី Family Link អាចធ្វើបានតែនៅពេលឧបករណ៍ Android របស់គាត់បើក និងភ្ជាប់អ៊ីនធឺណិតប៉ុណ្ណោះ។
នៅពេលកូនរបស់អ្នកមានអាយុ 13 ឆ្នាំ (អាយុអាចខុសគ្នាទៅតាមប្រទេស) គាត់អាចជ្រើសរើសគ្រប់គ្រងគណនីរបស់គាត់ដោយផ្ទាល់ ដោយមិនចាំបាច់មានការគ្រប់គ្រងពីអ្នកឡើយ។
សេវាកម្មជាច្រើនរបស់យើងអនុញ្ញាតឱ្យកូនរបស់អ្នកធ្វើអន្តរកម្មជាមួយអ្នកដទៃទៀតដែលប្រើសេវាកម្មរបស់យើង។ យើងចង់រក្សាមជ្ឈដ្ឋានដែលមានការគោរពសម្រាប់អ្នករាល់គ្នា។ នេះមានន័យថា កូនរបស់អ្នកត្រូវតែអនុវត្តតាមវិធានប្រតិបត្តិមូលដ្ឋាន ដូចជាមិនបំពានឬបង្កគ្រោះថ្នាក់ដល់អ្នកដទៃឬខ្លួនឯង (ឬគំរាមកំហែង ឬលើកទឹកចិត្តឱ្យមានការបំពាន ឬបង្កគ្រោះថ្នាក់បែបនេះ) ឧទាហរណ៍ តាមរយៈការនាំឱ្យយល់ខុស ការបោកប្រាស់ ការបរិហារកេរ្តិ៍ ការសម្លុតធ្វើបាប ការបៀតបៀន ការឈ្លបតាមដានអ្នកដទៃ ឬតាមរយៈការចែកចាយខ្លឹមសារដែលបង្កការស្អប់ខ្ពើមជាសាធារណៈ (ដូចជាខ្លឹមសារញុះញង់ឱ្យមានការស្អប់ខ្ពើម ឬការរើសអើងពាក់ព័ន្ធនឹងដើមកំណើត ពូជសាសន៍ សាសនា ភេទ និន្នាការផ្លូវភេទរបស់មនុស្ស។ល។) នៅពេលប្រើប្រាស់សេវាកម្មរបស់យើង។ ការបោះផ្សាយខ្លឹមសារដែលបង្កការស្អប់ខ្ពើមអាចធ្វើឱ្យអ្នក និងកូនរបស់អ្នកប្រឈមនឹងការទទួលខុសត្រូវចំពោះការបំពានក្រមរដ្ឋប្បវេណី ឬក្រមព្រហ្មទណ្ឌ។
ដើម្បីអាចឱ្យកូនរបស់អ្នកមានកម្រងព័ត៌មាន ឬគណនី Google របស់គាត់ផ្ទាល់ យើងអាចត្រូវការការអនុញ្ញាតពីអ្នក ដើម្បីប្រមូល ប្រើ ឬបញ្ចេញព័ត៌មានរបស់កូនអ្នក ដូចដែលមានពណ៌នានៅក្នុងសេចក្ដីជូនដំណឹងអំពីឯកជនភាពនេះ និងគោលការណ៍ឯកជនភាព Google។ នៅពេលអ្នកអនុញ្ញាតឱ្យកូនរបស់អ្នកប្រើសេវាកម្មរបស់យើង មានន័យថា អ្នក និងកូនរបស់អ្នកជឿទុកចិត្តលើយើងចំពោះព័ត៌មានរបស់អ្នក។ យើងដឹងថា នេះគឺជាការទទួលខុសត្រូវដ៏ធំមួយ និងប្រឹងប្រែងការពារព័ត៌មានរបស់អ្នក ព្រមទាំងផ្ដល់លទ្ធភាពឱ្យអ្នកគ្រប់គ្រង។ អ្នកអាចជ្រើសរើសថាតើកូនរបស់អ្នកអាចគ្រប់គ្រងការត្រួតពិនិត្យសកម្មភាពរបស់គាត់បានឬអត់សម្រាប់អ្វីៗ ដូចជាសកម្មភាពកម្មវិធីនិងគេហទំព័រ, ប្រវត្តិនៅលើ YouTube និងការភ្ជាប់សេវាកម្ម Google ជាក់លាក់នៅក្នុងតំបន់ដែលពាក់ព័ន្ធ។
ការជូនដំណឹងអំពីឯកជនភាពសម្រាប់កម្រងព័ត៌មាន និងគណនី Google ដែលស្ថិតក្រោមការគ្រប់គ្រងដោយប្រើ Family Link សម្រាប់កុមារអាយុក្រោម 13 ឆ្នាំ (ឬអាយុដែលបានកំណត់នៅក្នុងប្រទេសរបស់អ្នក) នេះ និងគោលការណ៍ឯកជនភាព Google ពន្យល់អំពីការអនុវត្តឯកជនភាពរបស់ Google។ ក្នុងវិសាលភាពដែលមានការអនុវត្តឯកជនភាពដែលពាក់ព័ន្ធជាក់លាក់នឹងកម្រងព័ត៌មាន ឬគណនីរបស់កូនអ្នក ដូចជាទាក់ទងនឹងការដាក់កំហិតលើការផ្សាយពាណិជ្ជកម្មដែលមានលក្ខណៈផ្ទាល់ខ្លួនជាដើម ភាពខុសគ្នាទាំងនោះត្រូវបានគូសបញ្ជាក់នៅក្នុងការជូនដំណឹងអំពីឯកជនភាពនេះ។
ការជូនដំណឹងអំពីឯកជនភាពនេះមិនអនុវត្តចំពោះកម្មវិធី សកម្មភាព ឬគេហទំព័រ (មិនមែនជារបស់ Google) ភាគីទីបីទាំងឡាយ ដែលកូនរបស់អ្នកអាចនឹងប្រើប្រាស់ទេ។ អ្នកគួរតែពិនិត្យមើលលក្ខខណ្ឌ និងគោលការណ៍ពាក់ព័ន្ធសម្រាប់កម្មវិធី សកម្មភាព និងគេហទំព័រភាគីទីបី ដើម្បីកំណត់ភាពសមស្របរបស់កម្មវិធី សកម្មភាព និងគេហទំព័រទាំងនោះសម្រាប់កូនរបស់អ្នក រួមទាំងការអនុវត្តចំពោះការប្រើប្រាស់ និងការប្រមូលទិន្នន័យរបស់កម្មវិធី សកម្មភាព និងគេហទំព័រទាំងនោះផងដែរ។
នៅពេលអ្នកផ្ដល់ការអនុញ្ញាតដល់កូនរបស់អ្នកឱ្យមានកម្រងព័ត៌មាន ឬគណនី Google ជាទូទៅកម្រងព័ត៌មាន ឬគណនីរបស់គាត់នឹងត្រូវបានចាត់ទុកដូចគណនីរបស់អ្នកផ្ទាល់ផងដែរ ទាក់ទងនឹងព័ត៌មានដែលយើងប្រមូល។ ឧទាហរណ៍ យើងប្រមូល៖
ជាផ្នែកមួយនៃដំណើរការបង្កើតកម្រងព័ត៌មាន ឬគណនី យើងអាចស្នើសុំព័ត៌មានផ្ទាល់ខ្លួនដូចជា នាមខ្លួននិងនាមត្រកូល អាសយដ្ឋានអ៊ីមែល និងថ្ងៃខែឆ្នាំកំណើតជាដើម។ យើងប្រមូលព័ត៌មានដែលអ្នក ឬកូនរបស់អ្នកផ្ដល់ឱ្យដូចជា ព័ត៌មានទំនាក់ទំនងលើអ៊ីនធឺណិតរបស់អ្នកដែលចាំបាច់ចំពោះយើងក្នុងការទាក់ទងអ្នក ដើម្បីស្នើសុំការយល់ព្រម។ យើងក៏ប្រមូលព័ត៌មានដែលកូនរបស់អ្នកបង្កើត បង្ហោះ ឬទទួលបានពីអ្នកផ្សេងផងដែរ នៅពេលប្រើប្រាស់កម្រងព័ត៌មាន ឬគណនីរបស់គាត់ដូចជា នៅពេលកូនរបស់អ្នករក្សាទុករូបភាពនៅក្នុង Google រូបថត ឬបង្កើតឯកសារនៅក្នុង Google ថាសជាដើម។
យើងប្រមូល និងរក្សាទុកដោយស្វ័យប្រវត្តិនូវព័ត៌មានជាក់លាក់អំពីសេវាកម្មដែលកូនរបស់អ្នកប្រើប្រាស់ និងរបៀបដែលកូនរបស់អ្នកប្រើប្រាស់សេវាកម្មទាំងនោះដូចជា នៅពេលដែលកូនរបស់អ្នកបញ្ចូលសំណួរនៅក្នុងម៉ាស៊ីនស្វែងរកនៅលើ Google ឬ Gemini, និយាយទៅកាន់ Google Assistant ឬមើលវីដេអូនៅលើ YouTube Kids ជាដើម។ ព័ត៌មាននេះរួមមាន៖
យើងប្រមូលព័ត៌មានអំពីកម្មវិធី កម្មវិធីរុករកតាមអ៊ីនធឺណិត និងឧបករណ៍ដែលកូនរបស់អ្នកប្រើប្រាស់ ដើម្បីចូលប្រើប្រាស់សេវាកម្ម Google រួមទាំងព័ត៌មានកំណត់អត្តសញ្ញាណខុសពីគេ ប្រភេទកម្មវិធីរុករកតាមអ៊ីនធឺណិតនិងការកំណត់ ប្រភេទឧបករណ៍និងការកំណត់ ប្រព័ន្ធប្រតិបត្តិការ ព័ត៌មានអំពីបណ្ដាញទូរសព្ទចល័ត រួមទាំងឈ្មោះនិងលេខទូរសព្ទរបស់ក្រុមហ៊ុនសេវាទូរសព្ទ និងលេខកំណែកម្មវិធី។ យើងក៏ប្រមូលព័ត៌មានអំពីអន្តរកម្មនៃកម្មវិធី កម្មវិធីរុករកតាមអ៊ីនធឺណិត និងឧបករណ៍របស់កូនអ្នកជាមួយសេវាកម្មរបស់យើងផងដែរ រួមទាំងអាសយដ្ឋាន IP, របាយការណ៍អំពីការគាំង, សកម្មភាពប្រព័ន្ធ និងកាលបរិច្ឆេទ ម៉ោង និង URL របស់អ្នកណែនាំសំណើរបស់កូនអ្នក។ ឧទាហរណ៍ យើងប្រមូលព័ត៌មាននេះ នៅពេលសេវាកម្ម Google នៅលើឧបករណ៍របស់កូនអ្នកទាក់ទងម៉ាស៊ីនមេរបស់យើងដូចជា នៅពេលគាត់ដំឡើងកម្មវិធីពី Play Store ជាដើម។
យើងប្រមូលព័ត៌មានអំពីសកម្មភាពរបស់កូនអ្នកនៅក្នុងសេវាកម្មរបស់យើង ដែលយើងប្រើប្រាស់ដើម្បីធ្វើអ្វីៗ ដូចជាណែនាំកម្មវិធីដែលគាត់ប្រហែលជាចូលចិត្តនៅលើ Google Play ដោយផ្អែកលើការកំណត់របស់កូនអ្នក។ អ្នកអាចជ្រើសរើសថាតើកូនរបស់អ្នកអាចគ្រប់គ្រងការត្រួតពិនិត្យសកម្មភាពរបស់គាត់បានឬអត់។ ព័ត៌មានសកម្មភាពរបស់កូនអ្នកដែលយើងប្រមូលអាចរួមបញ្ចូលអ្វីៗ ដូចជាពាក្យស្វែងរក, វីដេអូដែលគាត់មើល, ព័ត៌មានសំឡេងនៅពេលគាត់ប្រើប្រាស់មុខងារសំឡេង, មនុស្សដែលគាត់ប្រាស្រ័យទាក់ទងឬចែករំលែកខ្លឹមសារជាមួយ និងប្រវត្តិរុករកតាមអ៊ីនធឺណិតនៅលើ Chrome ដែលគាត់បានធ្វើសមកាលកម្មជាមួយគណនី Google របស់គាត់។ ប្រសិនបើកូនរបស់អ្នកប្រើសេវាកម្មរបស់យើង ដើម្បីធ្វើការហៅនិងទទួលទូរសព្ទ ឬផ្ញើនិងទទួលសារ ឧទាហរណ៍ដោយប្រើ Google Meet យើងអាចប្រមូលព័ត៌មានកំណត់ហេតុពាក់ព័ន្ធនឹងសេវាកម្មទូរសព្ទ។ កូនរបស់អ្នកអាចចូលមើលគណនី Google របស់គាត់ ដើម្បីស្វែងរក និងគ្រប់គ្រងព័ត៌មានសកម្មភាពដែលត្រូវបានរក្សាទុកនៅក្នុងគណនី ឬកម្រងព័ត៌មានរបស់គាត់ ហើយអ្នកក៏អាចជួយគ្រប់គ្រងព័ត៌មានសកម្មភាពរបស់គាត់បានផងដែរ ដោយចូលគណនី Google របស់កូនអ្នក ឬចូលប្រើកម្រងព័ត៌មានរបស់គាត់នៅក្នុង Family Link។
យើងប្រមូលព័ត៌មានអំពីទីតាំងរបស់កូនអ្នក នៅពេលគាត់ប្រើប្រាស់សេវាកម្មរបស់យើង។ ទីតាំងរបស់កូនអ្នកអាចត្រូវបានកំណត់ដោយប្រើប្រាស់ GPS, អាសយដ្ឋាន IP, ទិន្នន័យឧបករណ៍ចាប់សញ្ញាពីឧបករណ៍របស់គាត់ និងព័ត៌មានអំពីអ្វីៗដែលនៅជិតឧបករណ៍របស់គាត់ដូចជា ដុំភ្ជាប់បណ្ដាញឥតខ្សែ Wi-Fi, បង្គោលអង់តែនទូរសព្ទ និងឧបករណ៍ដែលបើកប៊្លូធូសជាដើម។ ប្រភេទទិន្នន័យទីតាំងដែលយើងប្រមូល ផ្អែកលើឧបករណ៍របស់កូនអ្នក និងការកំណត់របស់អ្នកមួយផ្នែក។
យើងអាចប្រមូលព័ត៌មានសំឡេងរបស់កូនអ្នក។ ឧទាហរណ៍ ប្រសិនបើកូនរបស់អ្នកប្រើប្រាស់ការបញ្ជាឱ្យបើកដំណើរការសំឡេង (ឧ. “OK, Google” ឬចុចរូបមីក្រូហ្វូន) ការថតសំឡេង/ការនិយាយបន្ទាប់នឹងត្រូវបានដំណើរការ ដើម្បីឆ្លើយតបទៅនឹងសំណើរបស់គាត់។ លើសពីនេះ ប្រសិនបើជម្រើសសកម្មភាពសំឡេងរបស់កូនអ្នកដែលស្ថិតនៅក្រោមការកំណត់សកម្មភាពកម្មវិធី និងគេហទំព័រត្រូវបានធីក នោះការថតអន្តរកម្មជាសំឡេងរបស់គាត់ជាមួយ Google Assistant នៅលើឧបករណ៍ដែលចូលគណនី (បូករួមទាំងពីរបីវិនាទីមុន) អាចត្រូវបានរក្សាទុកទៅក្នុងគណនីរបស់គាត់។
យើងប្រើប្រាស់បច្ចេកវិទ្យាផ្សេងៗ ដើម្បីប្រមូល និងរក្សាទុកព័ត៌មានរបស់កូនអ្នក រួមទាំងខូគី ស្លាកភីកសែល ទំហំផ្ទុកមូលដ្ឋានដូចជា ទំហំផ្ទុកលើបណ្ដាញរបស់កម្មវិធីរុករកតាមអ៊ីនធឺណិតឬឃ្លាំងបម្រុងទិន្នន័យកម្មវិធី មូលដ្ឋានទិន្នន័យ និងកំណត់ហេតុម៉ាស៊ីនមេជាដើម។ យើងមិនត្រូវការឱ្យកូនរបស់អ្នកផ្ដល់ព័ត៌មានផ្ទាល់ខ្លួនលើសពីអ្វីដែលចាំបាច់ដោយសមហេតុផល ដើម្បីប្រើប្រាស់ផលិតផល និងសេវាកម្ម Google ដែលមានសម្រាប់គណនី ឬកម្រងព័ត៌មានទាំងនេះទេ។
គោលការណ៍ឯកជនភាពរបស់ Google ពន្យល់កាន់តែលម្អិតអំពីរបៀបដែលយើងអាចប្រើប្រាស់ទិន្នន័យដែល Google ប្រមូលពាក់ព័ន្ធនឹងកម្រងព័ត៌មាន ឬគណនី Google របស់កូនអ្នក។ ជាទូទៅ យើងប្រើប្រាស់ព័ត៌មានរបស់កូនអ្នក៖ ដើម្បីផ្ដល់ រក្សានិងកែលម្អសេវាកម្មរបស់យើង ដើម្បីអភិវឌ្ឍសេវាកម្មថ្មីៗ ដើម្បីប្ដូរសេវាកម្មរបស់យើងតាមបំណងសម្រាប់កូនរបស់អ្នក ដើម្បីវាស់ស្ទង់ប្រតិបត្តិការនិងស្វែងយល់អំពីរបៀបដែលសេវាកម្មរបស់យើងត្រូវបានប្រើប្រាស់ ដើម្បីទាក់ទងជាមួយកូនរបស់អ្នកដោយផ្ទាល់ ពាក់ព័ន្ធនឹងសេវាកម្មរបស់យើង ព្រមទាំងដើម្បីជួយលើកកម្ពស់សុវត្ថិភាព និងភាពអាចទុកចិត្តបានលើសេវាកម្មរបស់យើង។
យើងប្រើប្រាស់បច្ចេកវិទ្យាផ្សេងៗ ដើម្បីដំណើរការព័ត៌មានរបស់កូនអ្នកសម្រាប់គោលបំណងទាំងនេះ។ យើងប្រើប្រាស់ប្រព័ន្ធស្វ័យប្រវត្តិដែលវិភាគខ្លឹមសារ ឬអន្តរកម្មរបស់កូនអ្នក ដើម្បីផ្ដល់អ្វីៗដល់គាត់ដូចជា លទ្ធផលស្វែងរកដែលបានប្ដូរតាមបំណង ឬមុខងារផ្សេងទៀតដែលកំណត់ឱ្យស្របតាមរបៀបដែលគាត់ប្រើប្រាស់សេវាកម្មរបស់យើងជាដើម។ ហើយយើងវិភាគខ្លឹមសាររបស់កូនអ្នក ដើម្បីជួយឱ្យយើងរកឃើញការបំពានដូចជា សារឥតបានការ កម្មវិធីគ្រោះថ្នាក់ និងខ្លឹមសារខុសច្បាប់ជាដើម។ យើងក៏ប្រើប្រាស់ក្បួន ដើម្បីសម្គាល់លំនាំនៅក្នុងទិន្នន័យផងដែរ។ នៅពេលយើងរកឃើញសារឥតបានការ កម្មវិធីគ្រោះថ្នាក់ ខ្លឹមសារខុសច្បាប់ និងទម្រង់នៃការបំពានផ្សេងទៀតនៅលើប្រព័ន្ធរបស់យើងដែលបំពានលើគោលការណ៍របស់យើង នោះយើងអាចបិទកម្រងព័ត៌មានឬគណនីរបស់គាត់ ឬចាត់វិធានការសមស្របផ្សេងទៀត។ នៅក្នុងកាលៈទេសៈមួយចំនួន យើងក៏អាចរាយការណ៍អំពីការបំពាននេះទៅអាជ្ញាធរសមស្របផងដែរ។
ផ្អែកលើការកំណត់របស់កូនអ្នក យើងអាចប្រើប្រាស់ព័ត៌មានរបស់កូនអ្នក ដើម្បីផ្ដល់ការណែនាំ ខ្លឹមសារដែលមានលក្ខណៈផ្ទាល់ខ្លួន និងលទ្ធផលស្វែងរកដែលបានប្ដូរតាមបំណង។ ឧទាហរណ៍ ផ្អែកលើការកំណត់របស់កូនអ្នក Google Play អាចប្រើប្រាស់ព័ត៌មាន ដូចជាកម្មវិធីដែលកូនរបស់អ្នកបានដំឡើង ដើម្បីណែនាំកម្មវិធីថ្មីៗដែលគាត់អាចចូលចិត្ត។
លើសពីនេះទៀត ផ្អែកលើការកំណត់របស់កូនអ្នក យើងអាចដាក់ព័ត៌មានដែលយើងប្រមូលក្នុងចំណោមសេវាកម្មរបស់យើង និងនៅក្នុងឧបករណ៍របស់កូនអ្នកចូលគ្នាសម្រាប់គោលបំណងដែលបានរៀបរាប់ខាងលើ។ ផ្អែកលើការកំណត់កម្រងព័ត៌មាន ឬគណនីរបស់កូនអ្នក សកម្មភាពរបស់គាត់នៅលើគេហទំព័រ និងកម្មវិធីផ្សេងទៀត អាចត្រូវបានភ្ជាប់ជាមួយព័ត៌មានផ្ទាល់ខ្លួនរបស់គាត់ ដើម្បីកែលម្អសេវាកម្ម Google។
Google នឹងមិនបង្ហាញការផ្សាយពាណិជ្ជកម្មដែលមានលក្ខណៈផ្ទាល់ខ្លួនដល់កូនរបស់អ្នកទេ ដែលមានន័យថាការផ្សាយពាណិជ្ជកម្មនឹងមិនផ្អែកលើព័ត៌មានពីកម្រងព័ត៌មាន ឬគណនីរបស់កូនអ្នកឡើយ។ ផ្ទុយទៅវិញ ការផ្សាយពាណិជ្ជកម្មអាចអាស្រ័យលើព័ត៌មានដូចជា ខ្លឹមសារគេហទំព័រ ឬកម្មវិធីដែលកូនរបស់អ្នកកំពុងមើល សំណួរស្វែងរកបច្ចុប្បន្ន ឬទីតាំងទូទៅ (ដូចជាទីក្រុង ឬរដ្ឋជាដើម)។ នៅពេលរុករកនៅលើអ៊ីនធឺណិត ឬប្រើប្រាស់កម្មវិធីមិនមែនជារបស់ Google កូនរបស់អ្នកអាចឃើញការផ្សាយពាណិជ្ជកម្មរបស់អ្នកផ្សាយពាណិជ្ជកម្មផ្សេងទៀត (មិនមែនជារបស់ Google) រួមទាំងការផ្សាយពាណិជ្ជកម្មដែលមានលក្ខណៈផ្ទាល់ខ្លួនរបស់ភាគីទីបី។
កូនរបស់អ្នកប្រហែលជាអាចចែករំលែកព័ត៌មាន រួមទាំងរូបថត វីដេអូ សំឡេង និងទីតាំងជាសាធារណៈនិងជាមួយអ្នកផ្សេងទៀត នៅពេលចូលកម្រងព័ត៌មាន ឬគណនី Google របស់គាត់។ នៅពេលកូនរបស់អ្នកចែករំលែកព័ត៌មានជាសាធារណៈ ព័ត៌មាននោះអាចចូលប្រើប្រាស់បានតាមរយៈម៉ាស៊ីនស្វែងរកដូចជា ម៉ាស៊ីនស្វែងរកនៅលើ Google ជាដើម។
ព័ត៌មានដែលយើងប្រមូលអាចត្រូវបានចែករំលែកទៅខាងក្រៅ Google ក្នុងស្ថានភាពមួយចំនួនតូច។ យើងមិនចែករំលែកព័ត៌មានផ្ទាល់ខ្លួនជាមួយក្រុមហ៊ុន ស្ថាប័ន និងបុគ្គលនៅក្រៅ Google ទេ លើកលែងតែករណីខាងក្រោម៖
យើងនឹងចែករំលែកព័ត៌មានផ្ទាល់ខ្លួនទៅខាងក្រៅ Google ដោយមានការយល់ព្រម (ប្រសិនបើមាន)។
ព័ត៌មានរបស់កូនអ្នក រួមទាំងឈ្មោះ រូបថត អាសយដ្ឋានអ៊ីមែល និងការទិញនៅលើ Play របស់គាត់ អាចត្រូវបានចែករំលែកជាមួយសមាជិកក្រុមគ្រួសាររបស់អ្នកនៅលើ Google។
យើងផ្ដល់ព័ត៌មានផ្ទាល់ខ្លួនទៅកាន់ក្រុមហ៊ុនសម្ព័ន្ធរបស់យើង ឬអាជីវកម្មឬបុគ្គលដែលទុកចិត្តផ្សេងទៀត ដើម្បីដំណើរការព័ត៌មាននេះឱ្យយើង ដោយផ្អែកលើការណែនាំរបស់យើង និងអនុលោមតាមការជូនដំណឹងអំពីឯកជនភាពនេះ, គោលការណ៍ឯកជនភាព Google និងវិធានការសមស្របផ្សេងទៀតស្ដីពីការរក្សាការសម្ងាត់ និងការរក្សាសុវត្ថិភាព។
យើងនឹងចែករំលែកព័ត៌មានផ្ទាល់ខ្លួនជាមួយក្រុមហ៊ុន ស្ថាប័ន ឬបុគ្គលខាងក្រៅ Google ប្រសិនបើយើងមានការជឿជាក់ដោយភាពស្មោះត្រង់ថា ការចូលប្រើប្រាស់ ការប្រើប្រាស់ ការរក្សាទុក ឬការបញ្ចេញព័ត៌មាននេះមានភាពចាំបាច់ដោយសមហេតុផល ដើម្បី៖
បំពេញតាមសំណើរដ្ឋាភិបាលដែលអាចអនុវត្តបាន ដំណើរការផ្លូវច្បាប់ បទប្បញ្ញត្តិ ឬច្បាប់ជាធរមាន
អនុវត្តលក្ខខណ្ឌប្រើប្រាស់ជាធរមាន រួមទាំងការស៊ើបអង្កេតការបំពានដែលអាចកើតមាន
រកមើល ទប់ស្កាត់ ឬក៏ដោះស្រាយបញ្ហាគៃបន្លំ សន្តិសុខ ឬបច្ចេកទេស
ការពារប្រឆាំងនឹងការប៉ះពាល់ដល់សិទ្ធិ ទ្រព្យសម្បត្តិ ឬសុវត្ថិភាពរបស់ Google, អ្នកប្រើប្រាស់របស់យើង ឬសាធារណជនតាមការទាមទារ ឬដោយមានការអនុញ្ញាតដោយច្បាប់។
យើងក៏អាចចែករំលែកព័ត៌មានដែលមិនអាចបញ្ជាក់អត្តសញ្ញាណបុគ្គលបាន (ដូចជានិន្នាការអំពីការប្រើប្រាស់សេវាកម្មរបស់យើងជាទូទៅ) ជាសាធារណៈ និងជាមួយដៃគូរបស់យើងផងដែរដូចជា អ្នកបោះពុម្ពផ្សាយ អ្នកផ្សាយពាណិជ្ជកម្ម អ្នកអភិវឌ្ឍន៍ ឬម្ចាស់កម្មសិទ្ធិជាដើម។ ឧទាហរណ៍ យើងចែករំលែកព័ត៌មានជាសាធារណៈ ដើម្បីបង្ហាញនិន្នាការអំពីការប្រើប្រាស់សេវាកម្មរបស់យើងជាទូទៅ។ យើងក៏អនុញ្ញាតឱ្យដៃគូជាក់លាក់ប្រមូលព័ត៌មានពីកម្មវិធីរុករកតាមអ៊ីនធឺណិត ឬឧបករណ៍សម្រាប់គោលបំណងផ្សាយពាណិជ្ជកម្ម និងវាស់ស្ទង់ផងដែរ ដោយប្រើប្រាស់ខូគីរបស់ពួកគេផ្ទាល់ ឬបច្ចេកវិទ្យាដែលស្រដៀងគ្នា។
ប្រសិនបើកូនរបស់អ្នកមានគណនី Google អ្នកអាចចូលប្រើប្រាស់ ធ្វើបច្ចុប្បន្នភាព លុប នាំចេញ និងដាក់កំហិតលើការដំណើរការព័ត៌មានរបស់កូនអ្នកដោយចូលគណនី Google របស់គាត់។ ប្រសិនបើអ្នកមិនចងចាំពាក្យសម្ងាត់របស់កូនអ្នកទេ អ្នកអាចកំណត់ពាក្យសម្ងាត់នោះឡើងវិញតាមរយៈកម្មវិធី Family Link ឬការកំណត់ Family Link នៅលើបណ្ដាញ។ នៅពេលចូលរួច អ្នកអាចប្រើការគ្រប់គ្រងផ្សេងៗដែលបានរៀបរាប់នៅក្នុងគោលការណ៍ឯកជនភាព Google ដូចជាការត្រួតពិនិត្យសកម្មភាព Google ដើម្បីជួយគ្រប់គ្រងព័ត៌មាន និងការកំណត់ឯកជនភាពរបស់កូនអ្នក។
ប្រសិនបើកូនរបស់អ្នកមានកម្រងព័ត៌មាន អ្នកអាចចូលប្រើប្រាស់ ធ្វើបច្ចុប្បន្នភាព លុប នាំចេញ និងដាក់កំហិតលើការដំណើរការព័ត៌មានរបស់កូនអ្នកតាមរយៈកម្មវិធី Family Link ឬការកំណត់ Family Link នៅលើបណ្ដាញ។
កូនរបស់អ្នកនឹងមានលទ្ធភាពលុបសកម្មភាពមុនៗរបស់គាត់នៅក្នុង "សកម្មភាពរបស់ខ្ញុំ" និងតាមលំនាំដើម ផ្ដល់ការអនុញ្ញាតកម្មវិធី (រួមទាំងអ្វីៗដូចជា ទីតាំងឧបករណ៍ មីក្រូហ្វូន ឬទំនាក់ទំនង) ដល់ភាគីទីបី។ អ្នកក៏អាចប្រើប្រាស់ Family Link ដើម្បីកែព័ត៌មានកម្រងព័ត៌មាន ឬគណនី Google របស់កូនអ្នក, ត្រួតពិនិត្យសកម្មភាពកម្មវិធី និងការអនុញ្ញាតកម្មវិធី ព្រមទាំងគ្រប់គ្រងលទ្ធភាពរបស់កូនអ្នកក្នុងការផ្ដល់ការអនុញ្ញាតមួយចំនួនឱ្យកម្មវិធី ឬសេវាកម្មភាគីទីបីចូលប្រើប្រាស់ព័ត៌មានរបស់កូនអ្នកផងដែរ។
ប្រសិនបើនៅពេលណាមួយ អ្នកចង់បញ្ឈប់ការប្រមូល ឬប្រើប្រាស់ព័ត៌មានរបស់កូនអ្នកតទៀត អ្នកអាចលុបកម្រងព័ត៌មាន ឬគណនី Google របស់កូនអ្នកដោយចុច “លុបគណនី” ឬ “លុបកម្រងព័ត៌មាន” នៅលើទំព័រព័ត៌មានកម្រងព័ត៌មាន ឬគណនីរបស់កូនអ្នកនៅក្នុងកម្មវិធី Family Link ឬការកំណត់ Family Link នៅលើបណ្ដាញ។ ព័ត៌មានកម្រងព័ត៌មាន ឬគណនីរបស់កូនអ្នកនឹងត្រូវបានលុបជាអចិន្ត្រៃយ៍ក្នុងរយៈពេលសមស្របមួយ។
ប្រសិនបើអ្នកមានសំណួរណាមួយអំពីកម្រងព័ត៌មាន ឬគណនី Google របស់កូនអ្នក សូមទាក់ទងមកយើង។ យើងនៅទីនេះដើម្បីជួយ។ អ្នកអាចរកឃើញព័ត៌មានបន្ថែមអំពី Family Link និងកម្រងព័ត៌មានឬគណនី Google របស់កូនអ្នកនៅក្នុងមជ្ឈមណ្ឌលជំនួយរបស់យើង។ អ្នកក៏អាចផ្ញើមតិកែលម្អមកយើងអំពី Family Link ឬកម្រងព័ត៌មានឬគណនី Google របស់កូនអ្នកនៅក្នុងកម្មវិធី Family Link ផងដែរ ដោយចុចម៉ឺនុយ ☰ > ជំនួយ និងមតិកែលម្អ > ផ្ញើមតិកែលម្អ ឬដោយទាក់ទងមកយើងតាមរយៈអ៊ីមែល ឬតាមរយៈអាសយដ្ឋានខាងក្រោម។
Google
1600 Amphitheatre Parkway
Mountain View, CA 94043 សហរដ្ឋអាមេរិក
ទូរសព្ទ៖ +1 855 696 1131 (សហរដ្ឋអាមេរិក)
សម្រាប់ប្រទេសផ្សេងទៀត សូមចូលទៅកាន់ g.co/FamilyLink/Contact
ប្រសិនបើអ្នកមានសំណួរអំពីរបៀបដែល Google ប្រមូល និងប្រើទិន្នន័យរបស់កូនអ្នក អ្នកអាចទាក់ទង Google និងការិយាល័យការពារទិន្នន័យរបស់យើង។ អ្នកក៏អាចទាក់ទងអាជ្ញាធរការពារទិន្នន័យនៅតាមមូលដ្ឋានរបស់អ្នកផងដែរ ប្រសិនបើអ្នកមានកង្វល់ទាក់ទងនឹងសិទ្ធិរបស់អ្នកក្រោមច្បាប់ក្នុងស្រុក។
